今晚西甲上演首都打吡，馬德里體育會主場硬撼皇家馬德里。「床單兵團」每逢打吡戰意特醒，尤其主場出擊搏甩髀，實同皇馬鬥到火花四濺，「讓球主客和」仲有得受讓，讓球主勝（+1）咪錯過。（Now 632周日晚10時15分直播）文:法達斯維
雖然馬體會開咧後表現飄忽，好彩近兩場總算擊敗皇家蘇斯達同奧沙辛拿，新兵約拿芬大衞頻有進帳，極速融入，有佢拍住盧卡文攻堅，就算祖利安艾華利斯未必出得都冇有怕。事實上，「床單兵團」對親皇馬特別醒神，唔單止近4次碰頭只係輸過1次咁大把，近7次聯賽主場碰頭，更錄得3勝3和僅1負，可見佢哋出戰打吡零舍搏命。
贏得艱苦讓波擇使
皇馬今季喺「寸王」摩連奴回巢執教後，戰績不俗，各項賽事近7仗獲6勝1負，但講到表現，尤其係客場總係打折扣，今季3次作客，先係小勝愛斯賓奴2比1，然後輸畀貝迪斯0比1，去到日前對住包尾嘅艾爾切，要鬥到補時入波險勝3比2，其中對愛斯賓奴同艾爾切，都係靠後備卡路士艾斯比建奇功先贏波。「銀河艦隊」作客弱隊都贏得咁辛苦，今仗造訪如狼似虎嘅馬體會，失分唔奇，讓球主勝（+1）有計。