歐國聯A1組一場焦點戰，意大利返主場再鬥土耳其。意大利一向食住土耳其，而且土軍例牌初段演出走樣，「藍衣軍團」有力搶先機，半場主勝好路。（周二凌晨2時45分開賽）文:法達斯維
意大利有功勳教頭文仙尼回巢，雖然首輪輸畀比利時，好彩之後大勝土耳其止跌，上仗力戰之下逼和法國1比1，士氣大振，門將基安盧基當拿隆馬全場作出7次撲救，可見球隊表現漸入佳境。何況「藍衣軍團」食慣土耳其，連同日前大勝一役在內，近4次交手取得3勝1和佳績，格食格冇得拗頸。
土耳其戰力輸晒
另邊廂，同樣由意籍主帥蒙迪拿執教嘅土耳其，頭3輪輸晒狂失8粒，「飛機仔」似乎冇乜計。連同今夏世盃在內，土耳其近6仗只得1勝5負，其中4仗上半場已經落後，反映出佢哋喺比賽初段防守唔夠集中，落後焗攻最終衰多兩錢重，以上周慘敗畀意大利1比4為例，佢哋開波9分鐘即失守，之後又喺5分鐘內連失兩粒，上半場已經落後3球，點追呀？既然土耳其呢個弱點一路未有改善，梗係捧意大利半場勝。