國際賽期啱啱結束，今日下午有日皇盃第3圈上演，仲有多場越級挑戰，當中包括RB大宮松鼠硬撼浦和紅鑽。RB大宮松鼠雖為日乙球隊，但各項賽事近11場僅逢1敗，球員信心爆棚；紅鑽踢法一向有前冇後，今仗勢必合演入球騷，捧2.5球大盤啱數。（周三下午5時開賽）文:法達斯維
日乙「4哥」RB大宮松鼠，係依家日乙唯一未輸過嘅球隊，踢咗9輪聯賽獲4勝5和，各項賽事加埋近11仗僅1敗，單計近5仗未輸過，非常硬淨，而且只有2仗交白卷；以杉本健勇、素帕納及中山昂大為首嘅進攻3叉戟，攻力唔錯，今場要爭取入波並唔困難。作客嘅日職勁旅浦和紅鑽一向崇尚進攻，佢哋以安拿胡阿道、南野遙海及水沼宏太為攻擊鐵三角，各項賽事近10仗狂轟22粒，火力非凡，其中9仗總入球開3球或以上，但當中只有2仗冇失波，明顯係有前冇後。以紅鑽一貫風格，今仗都係照辦煮碗以攻代守，捧中位數2.5球入球大相當穩陣。
三箭半大搶破磐城
另一場心水推介都係越級挑戰戲碼，磐城FC火併廣島三箭。磐城FC喺日乙排名下游，目前位列第16位，而且踢9輪聯賽失咗17粒，防守欠穩。相反，日職「3哥」三箭狀態大勇，各項賽事近5仗取得4勝1負，其中近4仗有3次半場開2球或以上，非常搶韁，為速戰速決預計今仗初段即搶攻，1.5球半場大更值博。