今晚英超頭場，紐卡素主場火併韋斯咸。紐卡素主場出擊入得又失得，「錘仔幫」自盧卡斯柏基達復出後攻力復整，隨時合演入球騷，2.5球大盤咪錯過。（Now 621及611周六晚8時30分直播）
東拿利再涉賭波或「加監」
紐卡素啱啱又收到壞消息，上年7月以5,500萬鎊（約5.4億港元）轉會費由AC米蘭加盟紐卡素嘅辛度東拿利，之前因為效力AC米蘭期間違規賭波，已在上年10月底被判罰停賽10個月，原本可於下季季初復出，但依家又出現變數，英格蘭足總最新發表聲明，指有證據顯示東拿利加盟「喜鵲」後，曾於2023年8月12日至10月12日期間50次違規賭波，佢可於今年4月5日或之前作出回應。紐卡素會方承認東拿利遭受英格蘭足總控告，會全力配合調查及支持球員。
睇番賓福特前鋒艾雲東尼上年5月因為違規賭波罪成，被英格蘭足總罰停賽8個月，今年1月中先至復出，估計如果東拿利今次罪成，可能面臨相近刑期，隨時下季都冇得重返球場，「喜鵲」得物冇所用，認真慘情。
講番今晚場波，紐卡素雖然近6場贏得1場咁大把，但佢哋主場出擊踢法進取，近7場主場全開3球或以上，另邊廂韋斯咸自從盧卡斯柏基達傷愈復出後，配合前線嘅查洛保雲，攻力回復正常，近6場只有1場食白果，入球大係不二之選。