今晚附加賽頭場，土耳其坐鎮主場火併羅馬尼亞。由於係一場過淘汰賽，土耳其有地利當然着數，加上佢哋球迷以狂熱見稱，挾近7次主場錄5勝之勢，有力輕取實力平庸嘅羅馬尼亞，讓球盤讓1/1.5球亦冇有怕，照捧上盤。（周五凌晨1時開賽）文:法達斯維
今場贏波一隊將躋身決賽對斯洛伐克或科索沃之勝方，土耳其本身實力較強，喺世盃外E組僅以3分落後畀西班牙屈居次席，主帥蒙迪拿麾下，坐擁皇馬新星艾達古拿、國米中場查漢奴古同祖雲達斯翼鋒基蘭耶迪斯等猛將，嚟到附加賽如虎入羊群。何況土耳其球迷向來熱情，往往營造出震懾客軍嘅聲勢，並非只有加拉塔沙雷主場獨有，難怪土軍喺主場特醒，近7次地頭比賽，獲5勝1和僅1負，唔講得笑。
羅馬尼亞作客腳軟
另邊廂，羅馬尼亞查實喺世盃外H組只排第3，僅靠歐國聯C2組排榜首嘅「後門」保送入附加賽。雖然老帥盧捷斯古已經盡做，但人腳就係得咁多，陣中較出名球員包括名宿赫傑囝囝伊亞尼斯赫傑、熱刺中堅達古仙及燕豪芬中場丹尼斯文，可惜佢哋作客腳軟，近3次客戰只得1和2負，2場敗仗係輸畀波斯尼亞同奧地利，造訪更加「恐怖」嘅土耳其，凶多吉少。